Agrobank Suv xo‘jaligi vazirligi bilan hamkorlikda
grant e’lon qiladi!

         So‘nggi yillarda suv resurslaridan samarali foydalanish, suv resurslarini boshqarish tizimini takomillashtirish, suv xo‘jaligi obyektlarini modernizatsiya qilish va rivojlantirish bo‘yicha izchil islohotlar amalga oshirilmoqda. Biroq global iqlim o‘zgarishi, aholi sonining va iqtisodiyot tarmoqlarining o‘sishi, ularning suvga bo‘lgan talabi yil sayin oshib borishi tufayli suv resurslarining taqchilligi yildan-yilga kuchayib bormoqda.

         O‘zbekiston Respublikasi Prezidentining 2023 yil 20 iyundagi “Ma’muriy islohotlar doirasida suv xo‘jaligi sohasida davlat boshqaruvini samarali tashkil qilish chora-tadbirlari to‘g‘risida”gi PF-101-sonli Farmonining 11-bandida “Agrobank” ATB tomonidan suv xo‘jaligi sohasidagi ilmiy-tadqiqot va tajriba-konstruktorlik ishlarini qo‘llab-quvvatlash maqsadida grant mablag‘i ajratilishi belgilangan.

Mazkur Farmonda berilgan topshiriqlar ijrosini ta’minlash maqsadida Suv xo‘jaligi vazirligi Agrobank ATB bilan hamkorlikda quyidagi:

1. ØRespublikada suv tanqisligini yumshatish;
2. ØInnovatsion sho‘r yuvish;
3. ØKanallarda suv yo‘qotilishini kamaytirish;
4. ØSuvni tejaydigan texnologiyalarni joriy etishning loyihalash va qurish asoslarini ishlab chiqish;

ØHududlarning tuproq-iqlim sharoiti, yerlarning meliorativ holati va ekin turlarini inobatga olgan holda sug‘orish rejimlarini ishlab chiqish kabi ustuvor yo‘nalishlar bo‘yicha amaliy va innovatsion loyihalar tanlovini e’lon qiladi.

         Tanlov O‘zbekiston Respublikasi Vazirlar Mahkamasining 2020 yil 9 martdagi “Ilmiy-tadqiqot va innovatsion faoliyatni rivojlantirishning normativ-huquqiy bazasini yanada takomillashtirish chora-tadbirlari to‘g‘risida”gi 133-son qarori bilan tasdiqlangan “Nizom” talablariga muvofiq amalga oshiriladi.

Tanlov shartlari

         Tanlovda ilmiy tadqiqot va oliy ta’lim muassasalari, ularning tarkibida tashkil etilgan ilmiy tadqiqot laboratoriyalari hamda O‘zbekiston Respublikasi hududida ilmiy tadqiqotlarni amalga oshirishi mumkin bo‘lgan boshqa ilmiy tashkilotlarning loyihalari qatnashadi.

            Loyihaning ilmiy rahbari tegishli ilmiy darajaga ega bo‘lishi shart.

            Suv xo‘jaligi sohasida ilmiy faoliyatga oid amaliy hamda innovatsion loyihalarni shakllantarish bo‘yicha namunaviy shakllari bilan tanishib chiqish mumkin.

            Suv xo‘jaligi sohasida ilmiy faoliyatga oid amaliy hamda innovatsion loyihalar innovatsiya@minwater.uz elektron pochtasi orqali joriy yilning 12yanvar kunidan 1 fevral kuniga qadar elektron shaklda qabul qilinadi.

            Loyihalar plagiat (antiplag.uz) tekshiruvidan o‘tkazilib innovatsiya@minwater.uz elektron pochtasiga yuborilishi lozim.

            Loyihalarning asl nusxalari skanerdan o‘tkazilib, loyihani to‘liq matnini “pdf” va “word” shaklida innovatsiya@minwater.uz elektron pochtasiga yuborilishi lozim:

Suv xo‘jaligi vazirligiga ijrochi tashkilot rahbariyati tomonidan imzolangan yo‘llanma хat;

ijrochi tashkilotning ilmiy (ilmiy-texnik) kengashi qaroridan ko‘chirma;

amaliy yoki innovatsion loyihaning to‘liq matni (imzo va muhr qo‘yilgan holda).

         Loyiha matni A4 formatdagi standart qog‘oz varag‘ining ikki tomonida joylashishi va qoida tariqasida 1,15 qator oralig‘ida yozilishi lozim. Har bir bet yuqoridan va pastdan 2 sm; chapdan 3 sm; o‘ngdan 1,5 sm hoshiyaga ega; xatboshi 1,27 sm ga teng va bir xilda bo‘lishi lozim. Matnni tayyorlashda “Times New Roman” 12 o‘lchamli shriftda “Misrosoft Word” matn redaktoridan foydalanish tavsiya qilinadi. Betlar titul varag‘idan boshlab oxirgi varaqqacha izchil ketma-ketlikda raqamlanadi. Betning tartib raqami varaqning pastki o‘ng burchagida 2 raqamidan boshlab yoziladi. Titul varag‘iga 1 raqami qo‘yilmaydi. Loyihaning har bir talab qilingan hujjati va boshqa tarkibiy qismlari yangi betdan rasmiylashtiriladi.

         Loyiha rahbarining mezonlarda talab qilingan ilmiy ishlar ro‘yxatiga (oxirgi 3 yil davomidagi nashrlar quyidagi xronologik tartibda keltirilib, ketma-ketlikda raqamlanadi) muvofiq holda rasmiylashtiriladi va muallif, ilmiy kotib tomonidan imzolanib, tashkilot muhri bilan tasdiqlanadi.

       Taqdim etilgan loyihalar tanlov talablariga rioya qilinganligi, loyiha materiallarining ishonchliligi va haqqoniyligi, ko‘chirmachilikka (plagiat) yo‘l qo‘yilmaganligi, talablar asosida shakllantirilganligi bo‘yicha Suv xo‘jaligi vazirligining ilmiy texnik kengashi tomonidan texnik ekspertizadan o‘tkaziladi.

            Texnik ekspertizadan o‘tmagan loyihalar tanlovning keyingi bosqichiga tavsiya etilmaydi.

            Loyihalar Ilmiy texnik kengashi tomonidan ilmiy ekspertizadan o‘tkaziladi. Ikkita ekspertga berilib, ularning har birining xulosalari

         60 balldan yuqori baholansa ilmiy ekspertizadan o‘tgan yoki 60 balldan past baholansa ilmiy ekspertizadan o‘tmagan hisoblanadi. Agar ekspertlardan bittasi 60 balldan yuqori baholasa, ikkinchisi 60 balldan past baholasa, loyiha uchinchi ekspertga beriladi.

            Ilmiy ekspertizadan o‘tmagan loyihalar, tanlovning keyingi bosqichiga tavsiya etilmaydi.

            Loyihalar Ilmiy texnik kengashi tomonidan moliyaviy ekspertizadan o‘tkaziladi.

           Taqdim etilgan loyihalarning dolzarbligi, sohadagi aniq muammolar yechimiga qaratilganligi, yangiligi, natijadorligi, loyiha materiallarining ishonchliligi va haqqoniyligi Ilmiy texnik kengashi tomonidan muhokamadan o‘tkaziladi.

           Kengash muhokamasida ma’qullangan loyihalar Ilmiy texnik kengash xulosasi orqali moliyalashtirishga tavsiya etiladi.

           Taqdim etilgan loyihalardagi ma’lumotlarning haqqoniyligi, natijadorligi, to‘liq va o‘z vaqtida bajarilishiga loyiha rahbarlari hamda bajaruvchi tashkilot rahbarlari javobgar hisoblanadi.

Eslatma: Tanlovda g‘olib deb topilgan loyihalar to‘g‘risida ma’lumot www.suvchi.gov.uz va www.agrobank.uz veb-saytlarida taqdim etiladi.